पुणे दि. २७ मार्च २०२६
महाराष्ट्र एज्युकेशन सोसायटीच्या म.ए.सो. ‘कलावर्धिनी’ तर्फे तीन दिवसीय ‘रंगवेध’ चित्रकला प्रदर्शनाचे आयोजन करण्यात आले आहे. उद्घाटन समारंभाचा कार्यक्रम शुक्रवार दिनांक २७ मार्च २०२६ रोजी सकाळी १०.३० वाजता म.ए.सो. राणी लक्ष्मीबाई मुलींची सैनिकी शाळेत ‘रंगवेध’ चित्रकला प्रदर्शन उद्घाटनाचा कार्यक्रम उत्साहात संपन्न झाला.
या चित्र प्रदर्शनाचे सुप्रसिद्ध नेत्रशल्य विशारद व चित्रकार डॉ. माधवी मेहेंदळे यांनी केले. प्रसंगी महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त) यांनी अध्यक्षस्थान भूषविले. संस्थेच्या नियामक मंडळाच्या उपाध्यक्षा सौ. आनंदीताई पाटील यांची विशेष उपस्थिती होती. म. ए. सो. कलावर्धिनी अध्यक्ष डॉ. दिलीप शेठ व महामात्र डॉ. गोविंद कुलकर्णी, महामात्र सौ. चित्रा नगरकर, म.ए.सो. राणी लक्ष्मीबाई मुलींची सैनिकी शाळेचे कमांडंट एविएन विंग कमांडर म. यज्ञरामन, सीनियर मास्टर/पर्यवेक्षक श्री. संदीप पवार या मान्यवरांना एन.सी.सी कॅडेट्सने मानवंदना दिली. मान्यवरांनी सैनिकी शाळेच्या घोष पथकाचे निरीक्षण आणि कौतुक केले. नेत्र शल्य विशारद व चित्रकार डॉ. माधवी मेहंदळे यांच्या हस्ते ‘रंगवेध’ चित्रकला प्रदर्शनाचे उद्घाटन करण्यात आले. रंगवेध फलकावर मान्यवरांनी स्वाक्षऱ्या केल्या. म.ए.सो. कलावर्धिनी रंगवेध चित्र प्रदर्शन हे आनंदी व उत्साह पूर्ण वातावरणात हा सोहळा उजळून निघाला. मान्यवरांचे कलादालनात आगमन झाले. सर्व मान्यवरांनी विद्यार्थी कलाकारांच्या चित्रांची पाहणी केली.
कार्यक्रमाची सुरुवात दीपप्रज्वलनाने झाली. व्यक्तिमत्व विकासाच्या सौ. श्रेया दिघे यांनी सरस्वती वंदना आपल्या मधुर स्वरात सादर केली. प्रशालेतील कॅडेट्सनी ‘स्वागतम शुभ स्वागतम’ हे स्वागतगीत सादर केले. म.ए.सो. कलावर्धिनीचे अध्यक्ष श्री. दिलीप शेठ यांनी कार्यक्रमाचे प्रास्ताविक केले. त्यांनी आपल्या प्रास्ताविकतेतून प्रत्येकामध्ये काही ना काही कला असते. प्रत्येक व्यक्तीत एक शिल्प दडलेले असते. कलावर्धिनीच्या माध्यमातून रंगवेध, स्वरवेध, तालवेध इ. उपक्रम सुरू असल्याचे सांगीतले. सुमारे ३०० हून अधिक निवडक चित्रांचे हे भव्य कलादालन असल्याचे मत व्यक्त केले.
म.ए.सो. च्या उपाध्यक्षा सौ. आनंदी पाटील यांनी आपल्या मनोगतातून चित्रकला विषयाला चालना देण्यासाठी म.ए.सो. कलावर्धिनी ची स्थापना करण्यात आली. तसेच प्रत्येकाने एक तरी कला जोपासली पाहिजे असे सांगितले व रंगवेध या उपक्रमास शुभेच्छा दिल्या.
यानंतर प्रसिद्ध नेत्रशल्य विशारद व चित्रकार डॉ. माधवी मेहेंदळे यांनी विद्यार्थिनी, शिक्षक व नागरिकांना मार्गदर्शन केले. आपल्या मार्गदर्शनातून व्यक्त होताना डॉ. मेहेंदळे म्हणाल्या की चित्रांमुळे एकाग्रता वाढते. डिजिटल स्क्रीन टाईम कमी होऊन चित्र काढण्यात स्वतःला व्यस्त ठेवता येते. कल्पना स्वातंत्र्यास वाव मिळून एक सकारात्मक ऊर्जा निर्माण होते. चित्रकला शिक्षणातून स्वतःचे वैचारिक क्षितिज विस्तारता येऊन व्यक्तिमत्वाची जडणघडण होते. म.ए.सो. आर्ट वॉलच्या माध्यमातून चित्रकला या विषयात सुंदर काम करीत आहे. चित्रांतून आपल्याला प्रेरणा, आनंद निर्माण होऊन मनातील भाव प्रकट करता येतात. सामाजिक संदेश देणारी, पर्यावरण विषयक मांडणी असणारी चित्रे देखील या प्रदर्शनात आवर्जून प्रदर्शित करण्यात आल्याचे त्यांनी सांगितले. भावना शब्दातून चित्रातून व्यक्त करता येत असते. कला ही सर्वांना जोडत असते. आदिमानवाने गुहांमध्ये काढलेली चित्रे यावरून असे समजते की त्यांचे जीवन कशा प्रकारचे होते हे समजते.
म.ए.सो. अध्यक्ष एअर मार्शल भूषण गोखले (निवृत्त) यांनी आपल्या मनोगतातून मी पुन्हा एकदा चित्र काढायला शिकत आहे असे आवर्जून सांगितले. म.ए.सो. चित्रकला विषयात नवनवीन कल्पना अमलात आणून विद्यार्थ्याच्या चित्रांचे एक उच्च दर्जाचे कलादालन उभारते ही एक वेगळी आणि युनिक अशी कल्पना असल्याचे त्यांनी सांगितले. या तीन दिवसीय प्रदर्शनात सुलेखन, फेस पेंटिंग, शिल्पकला इत्यादी विषयावर विविध सत्रे होणार असून, हे रंगवेध दि. २९ मार्च पर्यंत सर्वांसाठी खुले असणार आहे.
म.ए.सो. कलावर्धिनीचे महामात्र डॉ. श्री. गोविंद कुलकर्णी यांनी कार्यक्रमाचे आभार मानले. तर चित्रकला शिक्षिका सौ. यशोधिनी कुलकर्णी यांनी संपूर्ण कार्यक्रमाचे सूत्रसंचालन केले.
