प्रतिवर्षीप्रमाणे यावर्षीही इयत्ता आठवीच्या वर्गाचा विद्याव्रत समारंभ दिनांक 16 फेब्रुवारी 2025, रविवार रोजी सकाळी 10.00 ते 12.00 या वेळेत प्रशालेच्या बहुउद्देशीय सभागृहात मंगलमय वातावरणात संपन्न झाला. विद्याव्रत संस्कार म्हणजे विद्यार्थ्यांच्या माहितीत भर घालणे व त्यांची कौशल्य वाढविणे ही शिक्षणाची सामान्य कल्पना आहे. यांच्या जोडीला विद्यार्थ्यांची वृत्ती घडविणे आणि त्यांच्यामध्ये प्रेरणा जागृत करणे यांची भर घातली म्हणजे शिक्षणाची कल्पना अधिक समृद्ध होते. कौशल्य वाढविण्यासाठी सराव करावा लागतो. तर माहिती आत्मसात करण्यासाठी उजळणी करावी लागते. त्याचप्रमाणे वृत्ती घडविण्यासाठी मनावर आणि बुद्धीवर संस्कार व्हावे लागतात व प्रेरणा जागरणासाठी विद्यार्थ्यांना ध्येयदर्शन घडवावे लागते. शिक्षणाची ही चारही अंगे एकमेकांवर अवलंबून आहेत. स्वतःचे व्यक्तिमत्व पूर्ण विकसित करून ते कुटुंबाच्या, समाजाच्या, देशाच्या आणि ईश्वराच्या चरणी अर्पित करायचे आहे अशी मनोवृत्ती घडवण्यासाठी विद्याव्रत संस्कार आहे.
यावर्षीच्या विद्याव्रत संस्कार समारंभ कार्यक्रमासाठी प्रमुख आचार्या म्हणून माननीय डॉ. श्यामाताई घोणसे (संत नामदेव अध्यासन प्रमुख प्राध्यापक, सावित्रीबाई फुले पुणे विद्यापीठ) तसेच श्रीमती प्रितीलक्ष्मी यज्ञ रामन या व्रतार्थींना शुभ आशीर्वाद देण्यासाठी विशेष अतिथी म्हणून उपस्थित होत्या. तसेच प्रशालेचे कमांडंट एविएन विंग कमांडर म. यज्ञरामन, प्राचार्या श्रीमती पूजा जोग, सीनियर मास्टर व पर्यवेक्षक श्री. श्याम नांगरे, PRO व पर्यवेक्षक श्री. संदीप पवार, शिक्षक शिक्षकेत्तर कर्मचारी व पालक उपस्थित होते.
सदर विद्याव्रत संस्काराची सुरुवात प्रारंभिक व्याख्यानाने झाली होती. सदरचे प्रारंभिक व्याख्यान हे प्रशालेच्या प्राचार्या श्रीमती पूजा जोग यांनी घेतले. त्यानंतर इतर व्याख्याने प्रशालेतील शिक्षकांनी घेतली. शारीरिक विकसन- श्री भाऊसाहेब मार्तंड, मानसिक विकसन – सौ पियुषा सामंत व सौ श्रेया दिघे, बौद्धिक विकसन- मंगेश पाटील आत्मिक विकसन- कु. प्रियांका राजहंस, राष्ट्रअर्चना – सौ राजश्री गोफणे तसेच पोथी वाचन सराव व वाचन कु. प्रियांका राजहंस व सौ. श्रेया दिघे यांनी केले. कार्यक्रमाचे सूत्रसंचालन श्री. गजानन पाटील, कार्यक्रमाचे प्रास्ताविक मा. प्राचार्य श्रीमती पूजा जोग, पाहुण्यांच्या परिचय श्री श्याम नांगरे व आभार श्री. भाऊसाहेब मार्तंड यांनी मानले व पसायदानाने कार्यक्रमाची सांगता झाली. सदर कार्यक्रमाविषयी विद्यार्थिनी मनोगतामध्ये कॅडेट देविका ताड व कॅडेट सई भेलके तसेच सौ माधवीताई माने व श्री अतुलजी सराफ यांनी कार्यक्रमाविषयीचे मत पालक म्हणून मनोगतातून व्यक्त केले.
