मएसो राणी लक्ष्मीबाई मुलींची सैनिकी शाळा, कासार आंबोली विद्यालयाच्या गाईड कॅडेट्सचा लखनऊ मध्ये डंका !
राष्ट्रपतींना दिली सलामी : महाराष्ट्र एज्युकेशन सोसायटीच्या शिरपेचात मानाचा तुरा!
उत्तर प्रदेशच्या लखनऊ येथे दिनांक २३ ते २९ नोव्हेंबर २०२५ या कालावधीत पार पडलेल्या डायमंड जुबली ग्रँड फिनाले व १९ व्या राष्ट्रीय स्काऊट गाईड जांबोरीत मएसो राणी लक्ष्मीबाई मुलींची सैनिकी शाळेतील 9 गाईड कॅडेट्स नी महाराष्ट्राचे उत्कृष्ट प्रतिनिधित्व करत उल्लेखनीय कामगिरी केली. सैनिकी शाळेसाठी अभिमानाची बाब म्हणजे कॅडेट हिंदवी तेजस गुरसाळे आणि कॅडेट समीक्षा भूषण गांधी यांनी राष्ट्रपतींना उत्कृष्ट संचलन करत सलामी दिली.
जांबोरीच्या उद्घाटनाला उत्तर प्रदेशच्या राज्यपाल आनंदी बेन पटेल हजर होते. त्यांच्या स्वागतासाठी कॅडेट आर्या विनायक पन्हाळे, कॅडेट गायत्री गिरीश रसाळ, कॅडेट लावण्या बदर यांनी सलामी दिली. तसेच शेकोटी कार्यक्रमाच्या उद्घाटनाला मुख्यमंत्री योगी आदित्यनाथ उपस्थित होते. समारोप समारंभाची शान वाढवत भारताच्या राष्ट्रपती महामहिम द्रौपदी मुर्मू यांनी उपस्थित राहून सर्व स्काऊट गाईड्सना प्रोत्साहन दिले.
मएसो राणी लक्ष्मीबाई मुलींची सैनिकी शाळेतील कॅडेट समीक्षा भूषण गांधी, कॅडेट समृद्धी संदीप बलकवडे,
कॅडेट आर्या विनायक पन्हाळे, कॅडेट लावण्या नितीन बदर, कॅडेट गायत्री गिरीश रसाळ, कॅडेट शांभवी सुनील स्वामी, कॅडेट हिंदवी तेजस गुरसाळे, कॅडेट सानवी शरद मुरारी या गाईड्सनी महाराष्ट्राचे प्रतिनिधित्व करत विविध उपक्रमांमध्ये विशेष यश मिळवले. सदर गाईड पथकाचे नेतृत्व गाईड कॅप्टन म्हणून सौ. दिपाली आंबेकर यांनी केले. देशातील सर्व घटक राज्य व सर्व केंद्रशासित प्रदेश यातून 33 हजार स्काऊट गाईड सहभागी झाले होते. यात श्रीलंका, मालदीव, नेपाळ, संयुक्त अरब अमिरात, सौदी अरेबिया हेही देश सहभागी होते. गाईड्सनी कॅम्प क्राफ्ट, शेकोटी सादरीकरण, शोभायात्रा, नाईट हाईक, संचलन बँड पथक, पायोनियरिंग प्रोजेक्ट, कलर पार्टी अशा विविध उपक्रमात सहभाग घेतला. या यशामुळे महाराष्ट्र एज्युकेशन सोसायटीच्या शिरपेचात आणखी एक मानाचा तुरा रोवला आहे. या सर्व गाईड्सना प्रशालेचे कमांडंट एविएन विंग कमांडर यज्ञ रामन, प्राचार्या सौ. ज्योती खिरीड, सीनियर मास्टर श्री. संदीप पवार, गाईड कॅप्टन सौ. दिपाली आंबेकर, टीम मॅनेजर श्री. सुभेदार नवनाथ पवार यांचे अनमोल मार्गदर्शन लाभले. या यशाबद्दल संस्थेच्या नियामक मंडळ उपाध्यक्षा व शाला समिती अध्यक्षा सौ. आनंदीताई पाटील, महामात्रा प्रा. चित्रा नगरकर व महामात्र श्री. उमेश बिबवे यांनी अभिनंदन केले आहे.
