आज दिनांक 12 जून 2025 रोजी, महाराष्ट्र एज्युकेशन सोसायटीच्या क्रीडा वर्धिनी चे संस्थेतील क्रीडा शिक्षकांसाठीचे क्रीडा शिबिर म.ए.सो. राणी लक्ष्मीबाई मुलींच्या सैनिकी शाळेत उत्साहात सुरु झाले. या शिबिराचे उद्घाटन कबड्डी खेळाच्या पहिल्या महिला अर्जुन पुरस्कार विजेत्या श्रीमती शकुंतला खटावकर, कौन्सिलर श्री. शिरीष आपटे, म.ए.सो. संस्थेच्या नियामक मंडळाचे अध्यक्ष मा. श्री. बाबासाहेब शिंदे, क्रीडा वर्धिनी चे अध्यक्ष श्री. विजय भालेराव, समन्वयक श्री. शैलैश आपटे, संस्थेचे सचिव श्री. अतुल कुलकर्णी, सहसचिव श्री. सुधीर भोसले, सैनिकी शाळेचे कमांडंट एविएन विंग कमांडर एम. यज्ञरामन आणि शिबिर समन्वयक डॉ. उमेश बिबवे यांच्या उपस्थितीत झाले. महाराष्ट्र शासनाचा जीवन गौरव पुरस्कार मिळाल्याबद्दल संस्थेच्या माजी विद्यार्थिनी व कबड्डीच्या अर्जुन पुरस्कार विजेत्या श्रीमती शकुंतला खटावकर यांचा विशेष सन्मान नियामक मंडळ अध्यक्ष श्री. बाबासाहेब शिंदे यांच्या हस्ते करण्यात आला. या प्रसंगी आपल्या मनोगतात श्रीमती शकुंतला खटावकर यांनी खेळाचे महत्त्व सांगून म.ए.सो. संस्थेने दिलेल्या प्रोत्साहनाबद्दल आभार व्यक्त केले. अतिथी मनोगतात श्री. शिरीष आपटे यांनी खेळाडूंचे व्यक्तिमत्त्व घडविण्यात क्रीडा शिक्षकांचा सिंहाचा वाटा असतो असे सांगितले. अध्यक्षीय मनोगतात श्री. बाबासाहेब शिंदे यांनी सांगितले की विद्यार्थ्यांना शारीरिक व मानसिक सुदृढ, निरोगी ठेवण्यासाठी क्रीडा शिक्षकांनी नवनवीन तंत्रज्ञानाचा उपयोग केला पाहिजे असे सांगितले. या क्रीडा शिबिरात विविध खेळांची मैदाने, नियम यांविषयी व्याख्याने व प्रात्यक्षिके होणार आहेत.
